அமைச்சர் டாக்டர் அருண்ராஜ் அவர்கள் சென்னை வடபழனி விஜயா மருத்துவமனையில் நடைபெற்ற இந்திய தீவிர சிகிச்சைப் பிரிவு மருத்துவ சங்கத்தின் (ISCCM – Indian Society of Critical Care Medicine) செவிலியர்களுக்கான சிறப்பு தீவிர சிகிச்சைப் பயிற்சிப் பயிலரங்கை சிறப்பு விருந்தினராக கலந்து கொண்டு தொடங்கி வைத்தார்.
இந்திய தீவிர சிகிச்சைப் பிரிவு மருத்துவ சங்கம் சார்பில் செவிலியர்களுக்காக முதன்முறையாக இந்த சிறப்பு பயிற்சிப் பயிலரங்கு நடத்தப்பட்டது.
நிகழ்ச்சியில் பேசிய அமைச்சர் டாக்டர் அருண்ராஜ், இந்தியாவில் தீவிர சிகிச்சை மருத்துவத் துறையின் வளர்ச்சிக்கு ISCCM சிறப்பான பங்களிப்பை வழங்கி வருவதாகக் குறிப்பிட்டார்.
மருத்துவர்கள், செவிலியர்கள் மற்றும் தொழில்நுட்ப வல்லுநர்கள் அனைவரும் ஒருங்கிணைந்து குழுவாக செயல்படும்போதுதான் தீவிர சிகிச்சைப் பிரிவுகள் (ICU) திறம்பட இயங்க முடியும் என்றும் அவர் தெரிவித்தார்.
குறிப்பாக, தீவிர சிகிச்சைப் பிரிவுகளில் செவிலியர்களின் பங்கு மிகவும் முக்கியமானது என அவர் வலியுறுத்தினார். செவிலியர்கள் 24 மணி நேரமும் நோயாளிகளின் அருகில் இருந்து அவர்களின் உடல்நிலையில் ஏற்படும் ஆரம்பகட்ட மாற்றங்களைக் கண்டறிந்து, நோயாளிகளின் பாதுகாப்பை உறுதி செய்து, சிக்கல்களைத் தடுப்பதில் முக்கியப் பங்காற்றுகின்றனர்.
மேலும், நோயாளிகளுக்கும் அவர்களது குடும்பத்தினருக்கும் அன்பும் அரவணைப்பும் கொண்ட சிகிச்சையை வழங்குவதிலும் செவிலியர்களின் பங்கு குறிப்பிடத்தக்கது என்று அமைச்சர் தெரிவித்தார்.
“ஒரு மருத்துவமனையில் மருத்துவர்கள் மூளையாக செயல்படுகிறார்கள் என்றால், செவிலியர்கள் இதயமாக செயல்படுகிறார்கள்” என்று அவர் குறிப்பிட்டார்.
இந்த முக்கியமான கல்வி முயற்சியை முன்னெடுப்பதற்காக ISCCM அமைப்புடன் இணைந்து செயல்பட்ட விஜயா ஹெல்த் சென்டர் மற்றும் அதன் அறங்காவலர்களுக்கு அமைச்சர் டாக்டர் அருண்ராஜ் பாராட்டுகளைத் தெரிவித்தார்.
இந்த நிகழ்வில் விருகம்பாக்கம் சட்டமன்ற உறுப்பினரும், சட்டமன்ற அரசு கொறடாவுமான மாண்புமிகு சபரிநாதன் மற்றும் இந்திய தீவிர சிகிச்சைப் பிரிவு மருத்துவ சங்கத்தின் முக்கிய மருத்துவர்கள் உள்ளிட்டோர் கலந்து கொண்டனர்.