தேசிய குடற்புழு தொற்று தடுப்பு நாளை முன்னிட்டு, மாநிலம் முழுவதும் குடற்புழு தொற்று தடுப்பு மாத்திரைகள் வழங்கும் சிறப்பு முகாமை மாண்புமிகு மருத்துவம் மற்றும் மக்கள் நல்வாழ்வுத்துறை அமைச்சர் டாக்டர் அருண்ராஜ் இன்று தொடங்கி வைத்தார்.
சென்னை செனாய் நகரில் அமைந்துள்ள மாநகராட்சி பெண்கள் மேல்நிலைப் பள்ளியில் நடைபெற்ற நிகழ்ச்சியில், மாணவிகளுக்கு குடற்புழு தொற்று தடுப்பு மாத்திரைகளை அமைச்சர் வழங்கினார்.
இதனைத் தொடர்ந்து, குடற்புழு தொற்று தடுப்பு குறித்த உறுதிமொழி ஏற்றுக்கொள்ளப்பட்டது. மேலும், தமிழ்நாடு அரசின் சார்பில் தயாரிக்கப்பட்ட விழிப்புணர்வு காணொளி மற்றும் விழிப்புணர்வு துண்டுப் பிரசுரங்களும் வெளியிடப்பட்டன.
நிகழ்ச்சியில் பேசிய அமைச்சர் டாக்டர் அருண்ராஜ், அனீமியா உள்ளிட்ட பெண்களை அதிகம் பாதிக்கும் உடல்நலப் பிரச்சினைகளிலிருந்து பாதுகாத்துக் கொள்வதில் அனைவருக்கும் பொறுப்பு உள்ளது என்று குறிப்பிட்டார்.
மேலும், ஆகஸ்ட் 10 மற்றும் ஆகஸ்ட் 17 ஆகிய தேதிகளில் மாநிலம் முழுவதும் குடற்புழு தொற்று தடுப்பு மாத்திரைகள் வழங்கும் சிறப்பு முகாம்கள் நடைபெறுவதாக தெரிவித்தார்.
தமிழ்நாடு அரசின் சார்பில் ஆண்டுக்கு இரண்டு முறை வழங்கப்படும் ஆல்பெண்டசோல் (Albendazole) குடற்புழு நீக்க மாத்திரையை தகுதியானவர்கள் தவறாமல் எடுத்துக்கொண்டு, குடற்புழு தொற்றால் ஏற்படும் பாதிப்புகளில் இருந்து தங்களைப் பாதுகாத்துக் கொள்ள வேண்டும் என்றும் அமைச்சர் கேட்டுக்கொண்டார்.
உலக தாய்ப்பால் வார விழிப்புணர்வு
ஆகஸ்ட் 1 முதல் 7 வரை உலக தாய்ப்பால் வாரம் கடைப்பிடிக்கப்படுவதையொட்டி, தாய்ப்பாலின் முக்கியத்துவம் குறித்த விழிப்புணர்வை ஏற்படுத்தும் வகையில் தமிழ்நாடு அரசின் சார்பில் தயாரிக்கப்பட்ட காணொளியும் இந்நிகழ்ச்சியில் வெளியிடப்பட்டது.
தாய்ப்பாலின் முக்கியத்துவம் குறித்த விழிப்புணர்வை பொதுமக்களிடம் கொண்டு சேர்க்கும் வகையில் இந்த நடவடிக்கை மேற்கொள்ளப்பட்டது.
இந்நிகழ்ச்சியில் அண்ணா நகர் சட்டமன்ற உறுப்பினர் வி. கே. ராம்குமார், மருத்துவம் மற்றும் மக்கள் நல்வாழ்வுத்துறை அரசு செயலாளர் டாக்டர் தாரேஸ் அகமது, IAS, தேசிய நலவாழ்வு குழும இயக்குநர் டாக்டர் அனீஷ் சேகர், IAS, பெருநகர சென்னை மாநகராட்சி இணை ஆணையாளர் (கல்வி) க. கற்பகம், IAS, மத்திய வட்டார துணை ஆணையாளர் எச். ஆர். கௌஷிக், IAS, பொது சுகாதாரம் மற்றும் நோய் தடுப்பு மருந்துத்துறை இயக்குநர் டாக்டர் ஏ. சோமசுந்தரம், மருத்துவம் மற்றும் ஊரக நலப்பணி இயக்குநர் டாக்டர் ராஜ்மோகன் உள்ளிட்ட அரசு அதிகாரிகள் கலந்து கொண்டனர்.